Maanditaare boomaare

E ndu lewru henndu lor e meseer moyli e leydi am

Ko wonno ñalngu ɗelñitere ndimaagu am

Wontii ñalngu muusalla e bojji ngenndi am

Wul Taaya taaynii kala jikke e jimme e Fuuta am.

Maaje bojji e yiiye o walnii e waalo am.

Girji makko o hursinii haa gidimaga am.

28 jolal jolanaani leñol am

28 kooninke ɓaleejo njargaa jamma jeeytaare am

Ko koloñaal jommbaani o rufi dum e jey baaba am.

Gaño dawri ñifde kala hoodere ɓaleere e leydi am.

Laamu warhooreewu sari leñamleñamaawu e ngenndi am.

He dow ŋañaŋañalde o tekki jamfa

o takki fenaande koninkoo6e Fuuta.

Jamma 28 jolal jolanaani leñol am to Inal

Mi woyii yargaa6e e seddeende to Inaal

Koolol borjeende lenngaa gila mutal haa puɗal.

28 koninke toɗɗaa e doggol ina ɗeɗɗoyee e 6oggol

Ngam semmbinde e belaaɗe dawrugol kii6al

Jamma 28 jolal jolanaani leñol am.

Kono berɗe Yerii e Abdullaay e Umar wor6e njaawaldi

Yumma gooto e baaba gooto njiydi be ngubbidii

Ko kuraaji 6e mberlii adaa naatde 6oggi

Ngañgu ma66e timmii e warngo 6ikkon yumma Njaawaldi.

Sammba Sumarel e o jamma 6e njargii,

Sammba mo baaba Bokar gorko mo Bilbasi.

Tokara makko Sammba Demmba Kulibali 6e nguddirii

korsudo baaba Demmba 6e naworii ko toon heddii.

Ko 6uri duubi dutal, o jamma yejjitde min jogoraani.

28 jolal jolanaani leñol am.

6e hudaa6e jaas6e mbonnii leydi am,

ngubbii mahgol ngootaagu e ngenndi.am,

ngaawi jalludi ngañantumaagu  e 6esngu am

Ko wonno jamma wellitaare e weltaare

wontii jamma boomaare e sunaare.

28 jolal jalanaani leñol am.

Sagataabe teelii he gasɗe ɗe maantaaka.

Hay njanalon ɓe mbaɗanaaka be kaandinaaka.

lootde 6e e juulde 6e kam hoyɗaaka.

28 jolal jolanaani leñol am

Maawuya lorii tuddule baasal e nder majal

O woynii cim-cim mawdo jom duubi dutal

O werlii seemebbe e baayeeji e karawal

O sonii sagataabe laatinoo6e calɗi lenol.

O jamma nibbo jolal e jeereende Inaal.

Min njejjittaa ngol ciimtol haa buutufal.

Mo weltanii jamma 28 jolal min mbaɗa ɗum beeynel

Min mberlo ɗum e caanngol nantetaake no olel.

28 jolal jolanaani kadi jalanaani leñol am e daartol.

Kaaw Tokosel Tuure to Jowol