YIMRE PULAAR : Mi jummbat Elimaan Bilbasi

YIMRE PULAAR : Mi jummbat Elimaan Bilbasi

 Nden poolen!

-Mi loowii mboɗo duƴƴa gole
-Ee hol ko loori dahnde am?
-Joololel fijo koy ummiima,
joololel ummiima, ummanaaki mehre!
-Mi jummbat, mi njiñtanat Kaaw Tuure, oo Elimaan Bilbasi!

-Hooniiɓe sedduɓe warnooɓe cunnini!
-Ɓee bonɓe hoynuɓe ngoppaani tedduɓe!
-Fof-fof, ɓiɓɓe leydi huujnuɓe,
kala-kala egginɓe, taƴtinɓe, ridduɓe!
-Honɓe jawɗeele hay nguyka wujjuɓe
-Yoo rew laamɓe bonɓe, yontaaji nuskuɓe!
-Leydi am koy sappanaama soŋngere!
-Honuyaŋkooɓe ƴiiƴiiɓe, roondiiɓe finnere!
-Gite am ƴooganii soofaaji leydi am!
-Nde ciftor-mi dadiiɓe, wardaaɓe ɗeɗɗere!
-Mi woyii hoore am he ndee dunnaare!
-Ɗo neɗɗo naŋngiraa no teŋkere!
-Gite am ƴooganii kala leƴƴi leydi am,
ooyaaɗi, duuñaaɗi desanaaɗi tampere!
-Honɓe kala-kalaaji hay nguyka wujjuɓe,
hooniiɓe, lagginɓe booñuuji kala-kala!
-Fittuɓe, waariiɓe ɗalanaani abbere
-Muritaninaaɓe laatiima heyɗuɓe,
ɓe laatii ko hooƴaaɓe, ooyaaɓe loŋngere!
-Mor ɓee wuyɓe, ñawɓe haa ñawori ɗeɗɗere,
laamɓe waram-koyiiɓe hiilnaniiɓe ɓittere!
-Pittaali koy owii, he hurliraaɓe soklere!

. Ndenten, coñten ko yaawi poolen,
-So en ndentii, tiiɗen no «haayre tekkere»,
añɓe men cunoo no ɓuutaaɓe tikkere!
-Eɓena penta suɓngo fenaande, eɓe keboo, eɓe ñoroo, no dawooɓe doggere,
ɓe ngalaa ɓurnaaɗi, ɓurnuɓe loŋngere!
-Ee, leydi am, koy!
-Leydi am koy haaɗii,
leydi am haaɗii, haa laamu sooyii!
-Haa laamu sooyii no laamu toggere!
-Gorbal faayii, hulii, laatiima taaraandi lappere!
-Ko mooɓgu ɓesgu leydi tan, ittata ndee uddere!

. Ɓiɓɓe leydi ummee,
ɓiɓɓe leydi ndentee!
. Muritaninaaɓe ndentee,
penaale nguu laamu pakitii!
. Leƴƴi ooyaaɗi ndentee,
mahtaade ngenndi yontii!
. Doole men ko dental,
danndoore men tan ko potal e denndal!

Kuɗol Abdullaay. Demmba. Ñaŋ