POÈME EN PULAAR: SAAHAL

SAAHAL

SAAHAL moɗii jikke jibinii bayeeji
Saahal moɗii mawki serwinii laddeeji
Saahal moɗii moti mottinii geeseeji

SAAHAL moɗii TEEN
Teenɗo mawnde yaynii mawnde
Ubbiti hanki jalbini hannde
Mani Guumel mawnini Dono Gelaajo
Dono Satigeeɓe dono jaambareeɓe
Dono hanki nde lenngoowel lenngata fiɓnde
Loowa watoore summbana wolde ndimaagu
Saahal moɗii TEEN, Teen tuɗɗiima leppi teddungal

SAAHAL moɗii JIGGO
Jigginoɗo ganndal tafsiri nafoore
Biyɗo mbiy mi winndi ƴellitaare
Gooŋɗini goonga nefi fenaande
Waati Allah ñaamtaani
Saahal moDii Jiggo, Jiggo mojiima hannde leppi manoore

SAAHAL moɗii ɗaɗi njoorto dadaniiɓe wolde
Wakkiiɓe doole, yooɓiiɓe semmbe, dikkiiɓe yawaare
Saahal moɗii cagataagu yoolii cukaaku
Saahal firtii feere bonnii yaakaare
Duggi basaale hurni cooyle
Furni koode yunngini maajooɓe
Wiiri biidi halfi Baabaaɓe
Hatti bojji hanndii jaalooji
Saahal moɗii sagataaɓe, 

Sagataaɓe tuɗɗiima hannde leppi ndimaagu

Kono so weetii janngo Joom am
Waawi gaño saloo, bonɗo faddoo
Waawi lappi cokee, laabi kanndee
Ile ila, ceene killee
Kaaƴe koɗee, leɗɗe naattee
Teppe ciroo, jiyɗe cuddee
Semmbe saloo, doole eggami
Mi fahataa mi hurɓat
Mi ladataa mi weeyat
Mi ruuya waalo mi juuro ɗo ceene cuuɗi caayaale
To jeereendi joorti koode
Mi sunnoo, mi wiɗɗitoo, mi aastoo
Mi simmitoo, mi nodditoo, mi haamtoo
Mi dicca koppi mi eeroo
Leliiɓe to fotaani
Teelɓe to koddirani
Be giɗo jiimaani sehil suuɗaani
Biɗɗo woyaani Almaami juulaani

Hannde mi lorii e hoore aññeeje mon
Catel piindi fiɓnde ndimaagu
Guurowel e waaƴo salaare e ƴiiƴam yarlitaare.

IBRA MIFO SOW- Jowol Saare
Cukko hoorejo fedde FPC- EX-FLAM